مفيش علاقة كاملة ولا حياة مثالية وردية، لكن لتحقيق أقل خسارة والخروج بأكبر راحة، بصي جوة نفسك ولشريك حياتك وللنقط الجاية وشوفي انتي مع الراجل الصح ولا لا ..
1- اسألي نفسك، انتي عايزة ايه منه ومتوقعه انه يعوز ايه منك؟
أساس أي علاقة هو انكوا تحددوا انتوا عايزين ايه من بعض، بعد خمس سنين هتبقوا فين، حياتكوا هتبقى ماشية ازاي والى آخره .. افصلي الامان المادي عن حساباتك الاول، الماديات متغيرة مش واقع ثابت .. لو لقيتي انه محققلك الامان النفسي والاحتواء المطلوب فغالبًا انتي على الطريق الصح.
2- بتطلعوا من بعض احسن ما فيكوا.
حتى لو قارفين بعض، مهم انكوا تبقوا على أرض واحدة .. المشاكل شر لابد منه، ومش هنبقى خيالين ونقول لازم يعيشك 365 يوم سعادة، بس على الأقل أغلب ال365 يوم دول تبقى مرتاحة، لو مرتاحة معاه وقلبك منور يبقى انتي لسه على الطريق الصح.
3- بيشاركك أبسط اهتماماتك، وأراءه متوافقة معاكي.
التوافق هو أساس العلاقة، التوافق السياسي والتوافق في الاهتمامات حتى لو كانت بسيطة .. في حاجات ممكن تتغاضي عنها زي انه مبيحبش يروح معاكي وانتي بتعملي شوبينج، خليكي واقعية مفيش راجل بيحب ده، دي حاجة ممكن تستغني عنها او تلاقيله بديل، بس لو مبيحبش الأفلام وانتي مجنونة بيها مثلا، فكري هتقدري كل يوم لباقي حياتك معاه تتفرجي على الفيلم لوحدك ومتعرفيش تشاركيه أحداثه لانه مستسخف اللي انتي بتعمليه، وهكذا مع القراية او الرسم او اي اهتمام بسيط، وطبعا نفس الكلام على الأراء السياسية .. منصحكيش تكملي مع واحد اراءه السياسية او الحياتية مختلفة عنك 100% .. يا هيسيطر عليكي وهيكتم على نفسك وهيطبعك غصب بسياسته يا هتعيشوا في نقير وحش.
4- بتحبي عيوبه وبيتقبل عيوبك.
مفيش انسان بلا عيوب، بس في عيوب تتحب وعيوب يتفاتلها بلاد والموضوع نسبي، يعني غير المقبول بالنسبالي هو طبيعي بالنسبة لغيري، فكري في عيوبه وفي انك هتعيشي معاها باقي حياتك، فكري هتستحمليها ولا لا، يعني مثلا لو هو بياكل بصوت عالي وانتي بتكرهي الحركة دي هتقدري تعيشي طول عمرك معاه وهو بيعمل كده؟ وكذلك بالنسباله، من غير الصحي تمامًا انك تبقي في علاقة مع شخص بينتقدك طول الوقت، صح انه يوجهك للاحسن بس غلط انه يبقى على طول بيقطم فيكي ومبيشوفش غير الوحش اللي بتعمليه.
11- التواصل.
لو مفيش لغة حوار مشتركة يبقى علاقتكوا عاجلًا أو أجلًا هتفشل، أي مشكلة في الدنيا ينفع تتحل بالكلام والتفاهم، لو بيفهم كلامك غلط أو متعنت ومش بيسمعك يبقى متضيعيش وقتك انتي في علاقة غلط.
5- حطي نفسك الأول.
مهم انك تفكري فيه وفي احتياجاته، بس خلي نفسك الأول .. انتي أهم وسعادتك أهم لانك لما تبقى سعيدة هتعرفي تسعديه، متستمريش في علاقة انتي مش سعيدة فيها، ومتبقيش فراشة بتطوف حوالين نوره لانه هيجي في مرة يحرقك، انتي مش ملكه ولا هو ملكك، كل واحد فيكوا ليه حياته المنفصلة اللي بتتقابل في نقط معينة ولازم يبقى في خصوصية تنفصل فيها في نقط تانية، دوايركوا مهما حاولتوا مش هتتوحد لدايرة واحدة كبيرة، والا هتضعيوا انتوا الاتنين جواها، انتي كيان منفصل عنه بتتفقوا في حاجات وبتتقاطعوا في حاجات، متدمجيش كيانك بكيانه وتعمليه شمسك.
6- عيلته.
"انتي مش بتتجوزي فرد انتي بتتجوزي عيلة".
7- قيمي العلاقة.
شوفي الموضوع كله يستاهل ولا لا، بعين حيادية، خرجي نفسك من نفسك وبصي على علاقتكوا من بره، انتي في علاقة صحية هتستمر ولا مفيش أمل؟
مفيش حاجة مضمونة طبعا بس متستمريش في علاقة مع الشخص الغلط على أمل ضعيف ان العلاقة تتظبط.
8- بيحترم المرأة.
أخر حاجة تعوزيها انك تدخلي في علاقة مع شخص مش بيحترم المرأة، ابعدي عن الرجالة متدعي النسوية، اختاري راجل متربي صح، شايف ان المرأة كائن يستاهل الاحترام وميتكسفش انه يساعد في البيت او انه يعلن عن حبه.
9- بيحب اصحابك وحياتك.
لازم يكون بيحب اصحابك -بس مش بيحبهم أوي-، ابعدي عن الشخص النسونجي اللي بيحب اي انثى، بس لازم يبقى بيحب اصحابك وحياتك هتترحمي من مشاكل كتير وهتلاقي انسجام في حياتك.
10- بيحترم نفسه.
لانه لو احترم نفسه هيحترمك والحب في الاساس احترام.
*نشر في جهزني.كوم -تقريبا- !
ليست هناك تعليقات:
إرسال تعليق