في مرة طلبت منه أن لا ينساني فقال لي "أنساك ده كلام انساك يا سلام أهو ده اللي مش ممكن أبدًا"، أقسم اني استطيع تخيل صوته وهو يلحنها، يومها كررها كثيرًا ربما ليطمئنني وربما ليطمئن نفسه، لكنه نسى ونسيت واستمر صوت أم كلثوم يطير في الأفق يطمئن العاشقات ويصنع لهن حضن به دفئ سرمدي، ليستفقن بعده على سراب ويكتشفن أنهن لم يعشقن -ويالحسرتهن- إلا خيط دخان .. مجرد سراب ..
حبيبتي، كلنا لها .. سواء انتي اللي سايبة أو متسابة فهواجس العقل والخوف من المستقبل اللعين متساويان .. عيطي وصوتي وروحي قصي شعرك وكلي شيكولاتة وايس كريم وعيشي الحالة لأخرها واللي يقول عليكي دراما كوين قومي وريه الدراما على حقها، محدش فيهم هينفعك لو كتمتي جواكي ولا حد هيحس بيكي حتى لو كان مجرب .. وبعد ما تخلصي وتاخدي حقك من العياط وتتعبي من التفكير اتفرجي على الحاجات دي، هتوقف عقلك وهتعجبك وهتعيشك وقت منفصل سعيد وهتخرجي بعدها احسن بنسبة كبيرة ..
1- Aiyyaa
لو ملكيش في الهندي تعالي على نفسك وشوفيه، فعلًا جميل .. جرعة لطيفة مختلفة من الرقص والحب والضحك واللامستحيل طبعا .. أنصحك بيه بشدة.
2- Amelie
فيلم فرنساوي لطيف، هتعرفي بعده ان السنجلة مش وحشة للدرجة .. وان مش مهم تسيبي عشرة ولا يسيبك عشرين المهم ذا وان.
3- (500) Days of Summe
لو عايزة تعرفي ان مفيش حاجة اسمها ذا وان.
4- Young Frankenstein
فيلم كلاسيكي أبيض واسود والبطل حلو عينيه ملونه .. اضحكي شوية، وركزي في العلاقات وان ازاي نصيبك هيصيبك بشكل مكنتيش تتوقعيه.
5- Life is Beautiful
فيلم إيطالي كلاسيكي، اضحكي وشوفي الحب اللي بجد، وعيطي .. كتير، هترتاحي بعده وهتعرفي ان مصيبتك أهون من مصايب غيرك.
6- CATFISH movie
عشان لو قررتي تعملي فيك أكونت وتطلعي عين أهله، اتعلمي تسبكيها صح.
7- John Tucker Must Die
عشان الرجالة كلهم لازم يموتوا.
8- The First Wives Club
عشان كيدهن فعلًا عظيم، لو قررتي تنتقمي اتفرجي واتعلمي.
9-The Adjustment Bureau
عشان تعرفي انه كله مكتوب يا بنية وكلنا بنتحرك حسب مخطط مرسوم مخصوص عشاننا.
10- He's Just Not That Into You
عشان تعرفي ان العلاقات الانسانية معقدة، وركزي في المختلفين في الفيلم، هتيجي مرحلة تبقي انتي الاستثناء .. اتأكدي من ده.
11- Seeking a Friend for the End of the World
حتى لو بكرة نهاية العالم، هتلاقي حبك الحقيقي .. خليكي واثقة في كده.
12- فتاة المصنع.
عشان في رجالة عايزة الحرق، شوفي أخر مشهد واعرفي ان انتي اكبر من الحالة اللي انتي فيها.
مترميش نفسك في حضن حد تاني .. ابعدي عن أم كلثوم، وعن أي حاجة بتفكرك بيه .. اسمعي مزيكا عالية هتساعدك ترجعي من اللي انتي فيه .. خرجي نفسك من ملكوته .. انتي شمس مش مجرد تابع وصدقيني الحياة بتستمر بس أدي الوقت وقته وهو هيداوي قلبك :')
*نشر في مجلة نون.
ليست هناك تعليقات:
إرسال تعليق