*نزل على صفحة جهزني.كوم كسلسلة نصايح على صور ضمن هاشتاج بنفس الاسم.
صاحبتك على وش جواز؟
أكيد وقت الفرحة الكلام بيكتر، بتبقي عايزة تعرفي منها كل حاجة وتشاركيها أي حاجة، بس خلي بالك مش كل الحاجات ينفع تتقال ولا كل اللحظات ينفع تبقي فيها، المثل بيقولك خف تعوم، وحتى مع أقرب أصحابك لازم يبقى في خطوط ..
1-والله وبقيتي عروسة :
اه أخيرًا بقت عروسة، لو اللي على وش جواز مش صاحبتك من الدرجة الأولى متقوللهاش كده، متحاوليش تملي المحادثة بأي كلام عشان تبيني فرحتك، مهما كان سنها هي مكنتش قاعدة فاضية وأخيرًا حد عبرها، أكيد انتي نيتك كويسة بس ممكن تتفهم غلط.
2- ابدأي خسي:
لو صاحبتك وزنها زايد متنصحهاش بتقليل وزنها وهي داخلة على مرحلة جديدة، متقلليش ثقتها بنفسها، هي حلوة في كل الحالات وأكيد اللي حبها وقرر يتجوزها عارف ان وزنها زايد وحاببها كده، طبعًا لصحتها انصحيها تخس بس مش دلوقتي، استني لما تفضي دماغها من احتياجات المرحلة الجديدة.
3- لحقتي تعرفيه؟ :
أه غالبًا طالما قررت تتجوزه يبقى لحقت تعرفه، أكيد انتي بتتكلمي بطيب نية بس متشككهاش في معرفتها بيه، صاحبتك وافقت انها تكمل مع الشخص ده حياتها، خليكي واثقة في ذوقها وادعميها.
4- الشبكة بكام؟ :
الشبكة هدية من العريس للعروسة، وطبعًا الهدية مش بتمنها الهدية بقيمتها، سواء جابلها نجم من السما او خاتم صيني متحاوليش انك تقولي غير مبروك ربنا يتمم بخير، ومتنتقديش ذوقها في اختيار الشبكة لان هي اللي هتلبسها، ومش مهم ايه اللي جاي المهم مين جايبه.
5- مش بنت طنط فُلانة اتطلقت ! :
فعلًا! الله يكون في عون بنت طنط فُلانة اللي اتطلقت/ اتخانقت مع جوزها أو حصلها أي حاجة وحشة، بس أوعي تشاركي صاحبتك تجارب سلبية وهي داخلة على جواز، هتبقي عاملة زي شومان في فيلم فول الصين العظيم في مشهد الطيارة، فاكرة قلق محمد هندي! انتي هتخلي صاحبتك قلقانة من الجواز كده.
6- انتي على طول مشغولة! :
لازم تراعي ان اولوياتها اختلفت، طبعًا انتي ليكي حق عليها هي لازم تراعيه، بس انتي كمان لازم تراعي انها وراها انشغالات كتير لو مش بدنيًا فذهنيًا، راعي ان صاحبتك بتخطط لحياة جديدة كُليًا وبتبني بيت من الالف للياء.
7- جابلك الهدية دي بكام؟ :
زي ما قولنا على الشبكة فأي هدية تانية برضه مش مفروض تسألي على سعرها، ولا تخمني سعرها بصوت عالي، الهدية بين الأحباب برمزيتها وقيمتها المعنوية مش بتمنها، اشكري صاحبتك انها شاركتك فرحتها بيها وورتهالك قوليلها ربنا يخليه ليكي ويجيبلك، قوليلها أي حاجة لطيفة وافرحي لفرحتها ومتحاوليش تعيبي على ذوقه أو تقفليها من الهدية.
8- أمه عايشة ؟ :
لو اه هيضرك في ايه ولو لا هيفيدك بايه؟
الحموات الشريرات انقرضوا مع ماري منيب وميمي شكيب، في وسط الكلام أكيد هي هتجيبلك سيرة أمه وأبوه لو عايشين ربنا يخليهومله لو ميتين فالبقاء الله بس ميصحش انتي تسألي.
9- ايه ده الشقة ايجار ! :
لو الشقة ايجار متعقديهاش منها، هي مُدركة انها ايجار جديد وان خسارة الفلوس اللي هتضيع في التوضيب وان خسارة ايجار كل شهر بس لو في بديل أكيد مكانوش هيلجأوا للايجار، لو الشقة بعيد او صغيرة او في مكان مش حلو قوليلها حلوة وبكرة ربنا يكرمكوا وتجيبوا الأحسن بس متعقدهاش من شقتها.
10- دفع كام في العزومة! :
اعرفي انك مينفعش تسألي على أي حاجة فيها ماديات لان هي نفسها مش مفروض تسأله دفع كام، العزومة زي الهدية وأدام بيحبوا بعض يبقى مش مهم عزمها فين ولا بكام.
11- ياريتني كنت معاكوا :
أكيد هي كمان نفسها تشاركيها لحظاتها الحلوة، بس في لحظات حميمية مينفعش تبقي فيها، حسسيها انك فرحانة لفرحها مش انك زعلانة انك محضرتيش فرحتها مباشر.
في أي وقت صاحبتك تحتاجك فيه من حقها عليكي انها تلاقيكي جنبها، بس في نفس الوقت لو مطلبتش وجودك متفرضيش نفسك، لو هما الاتنين خارجين مع بعض لوحدهم او لو رايحين يشتروا حاجة أو يجهزوا للشقة ومطلبتش وجودك من الأفضل انك متروحيش، جميل انك تعوزي تشاركيها الفترة دي بس برضه متدخليش اوي في حياتها عشان الموضوع كله هيتقلب للضد.
لو العريس مش عاجبك متتكلميش، متقوليش رأيك لصاحبتك هي أكيد أدرى، خلي بالك ان الموضوع ممكن يتطور وتخسري صداقتها أو تفتكرك غيرانة منها متعرفيش برضه النفوس فيها ايه، حطي في دماغك ان هي اللي هتتجوز مش انتي وهي أكيد مش صغيرة وعارفة تختار ازاي تمشّي حياتها ..
المهم تخليكي واثقة في صاحبتك وذوقها وتدعميها في قراراتها وتوصليلها انك هتقفي معاها تحت أي ظروف، ممكن باسلوب كويس توعيها بحقوقها وواجباتها ولو انتي كارهة للرجالة التزمي الصمت، راعي ظروفها وانشغالها عنك في الفترة دي، وحسسيها انك دايمًا جنبها وفرحتها فرحتك، وربنا يتمللها بخير :')
ليست هناك تعليقات:
إرسال تعليق